Home Archives for فبراير 2015

السبت، 21 فبراير 2015

العاهه رقم 3 : تالتة ابتدائي شهادة !!!!

    ليست هناك تعليقات

و احنا صغيرين في تالته ابتدائي اهالينا كانو بيقولو لينا ذاكرو كويس لازم مجموع تالته ابتدائي شهاده ... عمري ما فهمت ساعتها يعني ايه موضوع شهاده اللي كنت اعرفه ان فيه سنين نقل و سنين شهاده لما كبرت شويه فهمت ايه موضوع الشهاده ده ... الموضوع للي مش عارف كلمة شهاده دي يعني لو اخدت شهاده 3 ابتدائي و بطلت تعليم هايبقي معاك شهاده بتقول انك خلصت 3 ابتدائي انما مثلا لو سبت التعليم في تانيه ابتدائي مش هايبقي معاك شهاده ... السؤال هنا بقي ليه اهالينا فشخونا بالموضوع ده ؟؟!! ما احنا اكيد كنا هانكمل تعليمنا.... ممكن اتخيل الحوار ده بين بواب و ابنه او نجار و ابنه مع احترامي الكامل ليهم بس ساعتها ممكن اقدر انهم مش قادرين يصرفو علي ولادهم فا عايزنهم ياخدو شهاده و يتعلمو صانعه ساعتها الموضوع منطقي انما اللي مش منطقي خالص انك تلاقي عيل بيدفعله بتاع 10 الاف جنيه في السنه ممكن اقل او اكتر الايام دي و بيتقلو ذاكر علشان 3 ابتدائي شهاده..

ارحمو اهالينا و بتطلو تكررو حاجات مابقتش موجوده... ما تقعدوش عيل عندو بتاع 8 سنين و هو داخل امتحان العربي علشان خايف من موضوع الشهاده ده و هو مش عارف هو ايه اصلا علمو ولادكم حب اللي بيعلموه ... خليهم يحبو العلم و المعرفه .. عرفوهم العلم ده مفيد ليهم ازاي ... علموهم ازاي العلم بيقربهم من ربنا .... علموهم ازاي العلم بيرتقي بالبني ادم و فككو من ديك ام الشهاده 


الجمعة، 20 فبراير 2015

العاهه رقم 2 : هاتجوز علشان استقر !!

    ليست هناك تعليقات
في لحظات تجلي كده بتبقي قاعد مع ناس صحابك او قرايبك و تسمع الشاب من دول يقلك انا عايز اتجوز بقي علشان استقر و تلاقيه بيبص في السماء كده متامل و هايمان و مناجي الرحمان انه يستجيب لدعوته و يخلصه بقي من الشحططه اللي هو فيها علشان يستقر ... و ده بالنسبالي هو المنطق اللي فشخ الواقع خلينا نتكلم كفنين و نقول يعني ايه استقرار من غير من نجيب اصل الكلمه في المعجم و من غير تعاريف مبهرجه الاستفرار هو ان النهارده شيه امبارح و غالبا بعد مشيئه الله طبعا زي بكره .. الاستقرار يعني ما فيش مخاطر يعني الروتين و انعدام المفاجئات يعني ما فيش توقع لاي حاجه غير متوقعه بالنسباله حلوه او وحشه .. من الاخر يعني وجودك في منطقه الامان و الراحه النفسيه ... بعد التعريف ده تلاقي كل الشباب اللي عايز يتحوز علشان الاستقرار هو اصلا مستقر عنده شغله و يومه متنظم و مرتب ما فيش جديد اغلب الايام غير انه جاي من الشغل و رايح الجيم و راجع من الجيم للبيت و منه للقهوه ما فيش اصلا اي حاجه تدل علي عدم الاستقرار.

نيجي بقي للجواز.. الجواز مش استقرار طبعا بكل المقايس الدنيا متغيره فيه و فيها مفاجئات فيها انك ممكن تصحي الصبح تلاقي نفسك شايل مسئوليه ابن و ملزم انك تعيشه عيشه كويسه و تعليم و مدارس و حياه تانيه خالص .. فيها انك مش لوحدك و معاك واحده شايل مسئوليتها مطب صغير في الشغل ممكن يفشخلك حياتك , الحياه في الجواز كلها متغيرات و ما فيهاش ثوابت.. وو انت لوحدك شايل هم مشاكلك انت و بس في الجواز انت شايل هم مشاكلك و مشاكل  ولادك... يعني مافيش ديك ام اي استقرار 

ببساطه اللي مستني الاستقرار من الجواز هو نفس الشخص اللي مستني الاستقرار من نعم للدستور و نعم لانتخابات مبكره ... حلول عمرها ما جابت استقرار  

الأحد، 15 فبراير 2015

العاهه رقم 1 : كل اللي يعجبك و البس اللي يعجب الناس !! (كل اللي يعجيك و البس اللي يعجبك و ديك ام الناس)

    ليست هناك تعليقات

طبعا مش محتاج افكرك بالمثل الرهيب الفشيح "كل اللي يعجبك و البس اللي يعجب الناس" , مبدئيا المثل ده مش منطقي لان لو فضلت تاكل اللي يعجبك هاتطخن و بالتالي مش هاتعرف تلبس اللي يعجب الناس, و ثانيا ايه اللي هايحصل لما اعجب الناس ! و ثالثا انا هاعرف ازاي ان اللي هالبسه ده هايعجب الناس منين !! يعني تخيل معايا دلوقتي انك قررت تنزل تشتري هدوم ... انت واقف دلوقتي جوه المحل و لقيت قميص عاجيك هاتعرف منين انه هايعجب الناس هاتطلع الشارع و تاخد القميص معاك و تسال كل اللي رايح و اللي جاي اذا كان القميص عاجبه و لا لا ؟! 

كل اللي يعجبك, كل اللي انت شايفه مناسب ليك و لصحتك و اللبس اللي يخليك واثق من نفسك و مريحيك و سيبك من ديك ام الناس !! 

الأربعاء، 11 فبراير 2015

الهدف من الموضوع ! (انت عايز ايه ؟!)

    هناك تعليق واحد




ناس كتير هاتسالني انت عايز ايه ؟! الموضوع ببساطه اني كشخص مصري و بعتز بالموضوع ده شايف ان بقي فيه شويه عادات و تقاليد و كتب للاصول مالهاش اي اصل و لا مرجع غير ان شويه ناس قعده مع بعض و قررو يعملو قالب للمجتمع يعيش فيه من بعدهم .. ايام و سنين عدت و الموضوع بقي بيتعمل من غير تفكير هاتسمع ناس مثلا بتقولك "عيب ما يصحش , الاصول بتقول كذا" انا بقي عايز اقف عند كلمه اصول دي شويه حلوين ... مبدائيا فين المرجع اللي ممكن نرجعله علشان اتاكد اللي انت بتقوله ده من الاصول و لا لا؟! ... يعني لو اختلفت معاك في الاصل رقم 11 في باب الزيارات العائليه هانعمل ايه ؟! هانرجع لمين مين اللي هايفصل في الموضوع؟.

ايوه يعني عايز ايه برضه ؟ انا عايز تفكر بره ديك ام الصندوق اللي اتحطينا فيه مش عايزك تبقي قليل الادب و لا بلطجي و لا قليل الزوق عايزك تفكر معايا في حاجات بقت بتتعمل علشان هي من الاصول او من العادات و التقاليد و هي اصلا غلط ... ده فيه حاجات حلال ما بقتش بتتعمل علشان الناس خايفين انهم يكسرو العادات و التقاليد و الاصول.. كل فتره هانزل هنا مثل او عاده او اصل من الاصول و اناقشه لو عندك تفسير ان ليه دي صح او غلط يا ريت تبقي تناقشو معايا..

الاشتراك في: الرسائل ( Atom )