عمرك عدي ال 40 مثلا و نفسك تخش كليه جديده او تدرس حاجه جديده او عايز تعمل ماجستير او دكتوراه دي حاجه حلوه جدا و محترمه و في صلب العقيده اصلا اننا نتعلم بس ثانيه واحده شعب ام الدنيا هايسمعك حاجه تكسر معونياتك "بعد ما شاب ودوه الكتاب" مثل من ضمن الامثله المتخلفه اللي هدفها في الاخر انك تبقي شخص عادي في مجتمع فاقد للطموح . المفروض و البديهي انك لما تشفني بتعلم حاجه جديده انك تتدعيلي بالتوفيق و ان ربنا يفتح عليا و يزيدني من علمه بس ازاي ! لازم تسمعني ديك ام مثل يحسسني اني بعمل حاجه عيب !
ده مثل بياكد لينا ان العاهات و التقاليد بتاعتنا عددت مستوي الحلال و الحرام , فضل العلم في الدين رهيب , ايوه رهيب لدرجه ان شيوخ الامه ما بيتكلموش عليه زي ما بيتكلمو علي دخول الحمام بالرجل اليمين و لا الشمال, العلم عندنا بقي من غير هدف العيال في ابتدائي هي مش عارفه هي بتعمل ايه هنا غير انها المفروض تنجح في الامتحان و هكذا الاعداديه و الثانويه و الجامعه لحد ما بيطلع للمجتمع كائن فوق سن العشرين سنه مبهم المعالم عديم الثقافه و تايه ! و لو فاق متاخر و راح اتعلم هايسمع "بعد ما شاب و دوه الكتاب"
اتفرجو علي المصريين اللي بيشاركو في "من سيربح المليون" و شوفو المصايب و حجم الجهل اللي بقينا فيه ! ده فين ناس بتخسر في الاسئله التافهه اللي في الاول ! المجتمع دلوقتي مش هاينبهر بيك لو عندك 3 ماجستير و 2 دكتوراه و 200 بحث منشور مثلا زي ما هاينبهر بيك لو عندك 10 مليون جنيه و عربيه فاخره , مجتمع بقي بيهتم بالمظهر و قيمه العلم بقي تحت و تحت خالص و لو فضلنا كده في الاحسن اننا نحتفي من علي وجه هذا الكوكب احنا خلاص مش مفيدين للبشريه ده بالعكس احنا بنضر البشريه و بقينا بننشر الجهل و التعصب و العنصريه يوم عن التاني , تخيلو لو العالم صحي الصبح مالقاش العالم العربي موجود , هايحصل حاجه ؟! لا طبعا بالعكس هايخدو ثروتنا و يستغلوها احسن مننا. عمرنا ما هانبقي ام الدنيا , ام الدنيا مش مكان و لا حتت ارض ام الدنيا هي مناره علم و حضاره .. افيقو يرحمكم الله
