العاهه رقم 5: ارحمو البنت المصريه !
البنت المصريه هي الكائن المظلوم في بلدنا في بلد بتتدعي معرفه الاصول و الحلال و الحرام, البنت المصريه هي كائن محطوط تحت الميكروسكوب من الجميع من اول لما تتولد لحد ما تموت... هاتسمع دايما الجمله السمجه لو انت خلفت بنت و جه حد يباركلك و يكون هو عنده ولد صغير بعد ما هيقلك مبروك و تتربي في عزك هايقلك انا خلاص حجزت مني لحماده ابني .. ممكن تشوفها حاجه عبيطه بس هي في الحقيقه هي عدم اعتراف باراده البنت و حقها في الاختيار و هي في اللفه لان ببساطه العكس ما بيحصلش لما تيجي تبارك لحد مخلف ولد اكيد مش هاتقله انا حاجز حماده لمني بنتي...
تكبر البنت شويه و تخش المدرسه قارن بقي التعليمات اللي بتتقال للولد و البنت في الفنره دي ... الولد بيتقالو 3 او 4 حاجات كا نصيحه و لو قتل حد في المدرسه ممكن اهلو يضحكو و يقلك الواد حمش و راجل .. البنت هاتلاقي 20000 الف حاجه ما تعمليش ما تروحيش ما تكلميش فلان مش عارف مين لو قالك ايه اشتكي لمين و خلي بالك و خلي بالك و رغي كتيييير جدا..
تكبر شويه و تخش ثانويه عامه و هنا نوعيه الاهل بتختلف الموضوع بينقسم ناس محبطه زي خشي اي حاجه خفيفه كده يا ماما انتي كده كده هاتتجوزي و تقعدي في البيت و نوع بيسمع لبناته و بيحترم رغباتهم و ربنا يخليهم لولادهم يا رب ... تخش البت الكليه و هنا بقي الواقع بيتفشخ ممكن تبقي بنت عندها بتاع 17 او 18 سنه و في نظر الدنيا و الحياه عيله صغيره بس يطلعلها كائن غتت و تبت يروح يكلم اهلها و يتقدم و الجو الرخيص ده و يقلك اربيها انا علي ايدي و ضغط بقي من الاهل علي واد هما اصلا ما يعرفهوش و يفضلو يقولو احنا سالنا عليه و طلع كويس ... و معلش هنا عايز اقف عند كلمه سالنا عليه ايه نوعيه التحريات اللي بتعملها علشان تعرف ان الشخص ده كويس انت متخيل مثلا انك ممكن تروح تسال عند بيته هو فلان بن فلان ده كويس ؟ متوقع مثلا واحد جارهم او البواب يقلك ده ابن كلب زباله مثلا ؟ احنا اصلا بقينا في مجتمع ما حدش عارف جاره اصلا متوقع ايه من سؤالك السمج ده ؟! مش معني انك ما سمعتش حاجه وحشه عنه انه كويس ممكن يطلع مجنون بن مجنونه يطلع عينك انت و بنتك .... المهم ما علينا نرجع تاني لموضوع ان احنا سالنا عليه و ده كويس و الجو الرخيص ده .. بدل ما البنت تركز في دراستها و تشوف هي عايزه تتنيل تعمل ايه في حياتها يبفضل عندها الكابوس اللي منغص عليها عشيتها ده و طالعلها في كل حته و هنا بقي بيجي دور البنت يا توافق و تنهي حياتها اكلينكيا يا تفضل في حوارات و افلام تضايق اللي خلفوها لحد ما تخلص من عريس الغفله و ترجع تفكر هاتعمل ايه في حياتها.
تخلص الجامعه و يبتدي كل اللي حوالين البنت يسال هي هاتتخطب امتي و ماحدش يسالها هي ناويه تعمل ايه في حياتها ها تشتغل و لا هاتكلمل دراسات عليا الاسئله دي مش وارده طبعا ... و يا سلاااام بقي لو اتاخرت في الخطويه عشرين الف سؤال ليه اتاخرت و كل واحد بقي يبتدي يجود و يجاوب هو .. اصلها بتحب , اصلها متعقده , اصلها رخمه زي امها و هكذا و اللي بقي يبتدي يدعلها و يا رب نفرح بيكي بقي و زن في كل المناسبات العائليه و رغي و قرف ... المهم لو ما فيش حد في حياه البنت ده مش معناها اننا نسبها في حالها لا ازاي ماتجيش طبعا ... بنت خالتها علي بنت عمتها يبجلوها عرسان من شغلهم او صحابهم و قعدات صالونات علشان نجوز البت.. المهم ملخص المرحله ان البت اتخطبت الحمد لله سواء بقي حد عارفاه و بتحتبه او صالونات..
و يبتدي السؤال التاني هاتتنجوز امتي و السؤال ده ممكن يكون بعد يوم الخطوبه بيوم واحد لقبل يوم الفرح و ممكن يتسال عدد لا نهائي من المرات ... المهم تتجوز البنت و يا سلام لو فيه فرح .. هايبقي كل واحد معزوم في الفرح خبير نفسي بيحاول يحلل هي مبسوطه و لا لا و متوتره و لا لا و هو عامه الشخص ده مش جاي علشان يتبسط و يشارك الناس فرحنهم ده واحد جاي يعمل دور خبير نفسي و ياكل و يغور...
خلاص البنت اتجوزت ها هاتخلف امتي ؟ و يا سلام لو الخلفه اتاخرت نفس البني ادمين برضو هايظهرو و اللي هايقول اصل العبيب منه لا منها ... و اسئله من نوعيه مافيش حاجه جايه في السكه و قد ايه الاطفال حاجه كويسه و سبحان الله نفس الناس اللي بتشجعها علي الخلفه هي هي نفس الناس اللي بتشتكي من العيال و قرفهم... المهم البنت خلفت السؤال اللي بعده عقبال ما تخويه ... السؤال اللي بيجي في دماغي ساعتها و انت مال امك نخاويه و لا ندفه حي انت مال امك !!
المهم البت خاوت العيل و كل حاجه و قعدو خمس سنين و اطلقت ... ياد المصيبه و ياد المناحه و كان البنت ماتت و نظره المجتمع في موضوع الطلاق ده ان البنت هي اللي غلطانه ماحدش فكر انها ممكن تكون متجوزه واحد ابن ستين كلب بلطجي و بخيل و نتن و معفن لا ازاي هي اللي غلطانه برضه.. ضل راجل و لا ضل حيطه ؟! ده مثل ابن وسخه مش هاتعب نفسي علشان اتنقده اصلا هو لواحده اصلا مصيبه من مصايب الزمن اللي عايشين فيه..
الحاجه الوحيده اللي بيرحمو فيها البنت هي لحظه مماتها دي اللحظه اللي الكل بيبطل يسال و يعلق ... ارحمونا يا جدعان خليكم في حالكم اتمنو الخير و السعاده للبنت اتمنو انها تحقق اللي عايزاه اتمنو انها تبقي من انجح الشخصيات اتمنولها تكون ام عظيمه و زوجه لزوج عظيم بتحبه و تقدره و بيحترمها و بتحترمه .. اتمنولها السلام و الامان المجتمعي ... و علي فكره ضل حيطه احسن من ضل راجل ابن كلب
ليست هناك تعليقات :
إرسال تعليق