فكرت كتير قبل ما اكتب في الموضوع ده .. الصراحه مش عارف الناس هاتتقبله ازاي بس كالعاده مش مهم و مش فارقه كتير عايز تسمع اسمع مش عايز في زرار فوق كده علي شكل حرف اكس بيريح كتير في الحالات اللي زي كده.. نخش في الموضوع احنا مش شعب متدين بطبعه و الجو الرخيص ده اللي بنحكي فيه بقالنا كتير احنا شعب بنمارس عادات الدين و مش الدين نفسه زي ببساطه في مجتمعات عربيه في ناس بتروح تصلي في الجامع من غير وضوء علشان ببساطه الناس تشوفه و هو رايح و راجع من الجامع و يقولو عليه راجل و متدين و راجل صالح و فاضل و يجوزة بناتهم الي اخره و في مجتمعنا المصري البنت المحجبه هي البنت المحترمه الصالحة للجواز اللي تعرف تفتح بيت اللي يعيني ما بتصحبش و ما بتعرفش ولاد و احسن بكتير جدا من اللي بشعرها و في الحقيقه انها ممكن ما تكون عارفه قبلك 10 رجاله قبل كده و مدوبه السمكه و ديلها اكتر من بنت بشعرها ... انا ماعنديش مشاكل مع الحجاب علشان بس ما ندخلش في مواضيع فرعيه انا عندي مشكله ان الحجاب يبقي زي المرواح للمدرسه كده ... احنا بنروح المدرسه مش علشان نتعلم لا علشان كل الاطفال المفروض بيروحو المدرسه بنخش الجامعه مش علشان نتقن شغلانه معينه لا علشان يبقي معانا شهاده .. الحجاب بقي نفس الفكره ما بقاش علاقه روحانيه بين البنت و ربها .. الموضوع بقي زياده مبيعات لشركه كارينه و محجبه و مؤمنه و خلافه .. اكل عيش بما لا يخالف شرع الله .. فيه بنات بتزني و هي لابسه الحجاب و في ستات بتخون جوزها و هي لابسه الحجاب زي "عنتيل الغربيه" اغلب الستات اللي راحتله كانت محجبات ده مش معناه ان المشكله في الحجاب .. المشكله ببساطه في سبب لبس الحجاب لو ماكنش عن اقتناع شخصي و تقرب من البنت لربها يبقي مالوش لازمه و ممكن نعتبرة زي اي حاجه ببتلبس و خلاص حتت قماشه مش فارقه كتير عن بلوزه.. حجاب و كذب مينفعش ... حجاب و خيانه ماتنفعش ... حجاب و زنه ما ينفعش اكيد ... و بالنسبه للرجاله اللي بتحكم علي البنات من شكلها و طريقه لبسها هاقلك زي كوكاولا ما قالت اصبر شويه و احكم تاني.
كنت بتكلم مع ناس صحابي علي ان في ناس اتعودت انها تصلي لدرجه انها بتبقي في اوكرانيا مثلا و بتزني بكامل ارادتها و لما يجيي معاد الصلاه تقوم تصلي ! ده دين ايه ده ؟! و لا مش كويس انك تصلي و تزني.. ما ينفعش المعصيه و الطاعه يجتمعو في قلب واحد مش قادر افهم الناس المقتنعه ان الصلاه و الزنا احسن من الزنا من غير صلاه .. اللي هو مبدأ نص العما و لا العما كلة .. بالنسبالي البني ادمين اللي من النوعيه دي زي الحمير اللي شايله كتب بالظبط ... انت في الحالات اللي زي دي مش بتصلي انت بتلعب تمارين بطن خمس مرات في اليوم .. فيه فرق كبير بين انك تعمل المعصيه و ترجع تتوب و تحاول تطبل و ترجع للمعصيه تاني دي جزائها عند ربنا كبير . قال رسول الله صلي الله عليه و سلم " كل ابن آدم خطاء، وخير الخطَّائين التوّابون " .. فيه ناس كده لا بتصلي و لا بتصوم و اخلاقها زي الزفت و تيجي تكلمهم في الدين يفضلو يقولولك الشريعه و تفسير و مين قال و مين ماقلش ... ايوه انت عايز ايه مني ؟! انت بالظبط زي الحمار شايل كتاب و مش عارف هو ايه ده.
صورة تانية للتدين الظاهري الشيخ الي دقتنة عند كرشه و زبيبه الصلاه عاملة دايرة نص قطرها 20 سم في وشه و ماسك السبحه ليل و نهار و حرامي و غشاش و نصاب .. علي فكره السرقه حرام يا شيخنا و الغش برضه و لا انتو الجزء ده من الدين مش عندكو و لا هي عدة شغل علي فكرة يا شيخنا لما تتدي معاد لحد و تخلفة و تكذب علي خلق الله ده من صفات المنافقين مش قضاء و قدر و العجلة من الشيطان.
الخطاب الديني محتاج بلا شك تجديد .. الناس محتاجه تعرف ان الاخلاق مهمه و طلب العلم مهم برضة و اتقان العمل مهم برضة و بر الوالدين مهم برضة و تعاملك مع الناس بطريقة محترمه مهم برضة.
كل واحد فينا بقي عبارة عن مسخ مجهول الهوية هو مسلم و مش مسلم متدين و مش متدين محترم و مش محترم متعلم و مش متعلم امين و مش امين في نفس الوقت .. لازم نبتدي نلحق نفسنا و الاجيال اللي جايه من الضياع في الفراغ ده ..
- ازني و صلي و متنساش الصلاه في معادها كويس !!
- اسرق و غش الناس بس ما تنساش سنة العشاء !!
- اسكر طينة في بلاد برة بس خلي بالك من صلاة الجمعة !!
- ازني بس اتحجبي!
- اكذبي و غشي و خوني بس دخلي شعرك كويس تحت الطرحة !!
- صلي المغرب قبل ما تنزلي تباتي في شقة واحد صاحبك !
- خليك كده جاهل في امة اقرأ بس ما تنساش تاخد معاك السبحة كل يوم !!
و احب اختم باقتباس لدعاء دكتور عدنان ابراهيم "اللهم ان نبرأ الليك من هؤلاء و نسالك الهداية لهم و ان تسلك بهم سبيل المحسنين فقد اسائو الي انفسهم و الي الدين "
