العاهة رقم 7 : الحكم يالمظاهر (محافظه الغربيه كمثال علمي)
الراجل اللي بدقن و زبيبه صلاه ده محترم جدا يا اخي و امين اوي ... البنت المحجبه اللي هناك دي محترمه جدا و اخلاقها عليا ... الواد اللي بجل في راسه و بنطلونه ساقط ده تافه جدا ... حمد الله علي السلامه انت في ام الدنيا مصر .. الحكم علي المظاهر جزء لا يتجزء من المجتمع العفن اللي بقينا عايشين فيه .. مجتمع سطحي لاقصي درجه مجتمع فاكر نفسه بيعرف يحكم علي شخصيه اي حد و هو فيه كل العبر اللي في الدنيا مجتمع بيتكلم عن الاحترام و اغلبه سرقه و غش و كذب .. مجتمع بيتكلم عن الشهامه و الجدعنه بس التحرش متغلل في كل طبقات المجتمع.
مش معني ان بنت محجبه انها كده محترمه و مش معني انها بشعرها انها كده سافره و قليله الادب مش معني انه بدقن انه امين و عارف ربنا و مش معني انه حالق دقنه انه مش ملتزم و مش عارف ربنا .. مش معني ان ناس معاها فلوس كتير و فلل و عربيات انهم راقين بالعكس الواحد شاف ناس من غير فلوسها و لا تسوي نكله في عرف الانسانيه و الاخلاق و شاف ناس معاهمش حاجه و يساو كتير و شاف برضه اللي معاهمش حاجه و و لاد كلب برضه .. الكتاب ما بينيش من عنوانه لازم تتعرف علي اللي هاتحكم عليه لازم تتعامل معاه و في الاخر تبقي قرر هو محترم و لا نصاب و لا بن كلب و لا امين بلاش القولبه اللي بقينا عايشين فيها دي الله يكرمكم.
خلونا ناخد محافظه زي الغربيه .. الغربيه اثبتت ان المجتمع مريض لاقصي درجه .. لدرجه تفوق فعلا التوقعات ... احنا كل يومين نسمع عن عنتيل جديد الموضوع بقي متكرر بشكل ملحوظ ... خلينا نشوف مثلا عينه من العناتيل دي و عينه من اللي مارسو معاهم الرذيله ... هتلاقي عنتيل بدقن قد كده ماشاء الله يا اخي و زبيبه قد كده فوق الله اكبر يا اخي ايه التقوي و الايمان ده كله يا شيخ ! بس ثانيه واحده الراجل ده بيزني علي فكره ! اه يعني من الكبائر بس المهم اللحيه يا جماعه اصل حلقها حرام.. ممم طب و الضحيه لا دي ست محترمه محجبه يا اخي و لبسها ساتر ياااااااه يا اخي علي الاحترام ياااه علي التقوي بس ثانيه واحده دي بتخون جوزها و بتزني برضه !! يا جماعه المجتمع اتفشخ و شيوخنا الاجلاء العظماء عايزين يدعو للاسلام و ينشرو الدعوه للغرب العالماني الكافر !! و احنا هنا الدين بقي عادات و تقاليد الدين بقي زيه زي الغدي كده حاجه بتعملها كل يوم و خلاص نسيت بتعملها ليه.
الدين اتظلم معانا و المجتمع بقي مريض و النفاق في اجل صوره و اللي مش شايف كده يبقي اعمي و عندنا تيار ديني غبي لاقصي درجه و الازهر بقي دوره صفر و المدارس و خلاص الدين هايتلغلي فيها من كتر ما بقي مهمل... احنا دلوقتي لا عندنا مجتمع متدين و لا حتي محترم و لا مثقف .. حد يلحق الجيل الجديد هو ده الامل و ارحمونا بقي الاسلام مش محتاج عدد و لا الدين مظاهر الدين اخلاق قبل اي حاجه.
